Murugan Songs

வேல் வேல் வேல் வேல் வேல்முருகா – வேல்
வேல்முருகா வேல்முருகா வேல்முருகா வேல்

ஆடிப்பாடி உன்னைத்தானே தேடிவாரோவமே
அரோகரா என்று சொல்லிப்பாடுவாரோமே
தேடி வந்தோர் வாழ்க்கையிலே நலங்கொடுத்திடும்
தெண்டபாணித் தெய்வமே நீ தங்கத்தேரில் வாவா – (வேல் வேல்)

பார்புகளும் பழனிமலை ஆண்டவனேவா
பரங்குன்றப் பேரழகே வெளியெடுத்து வா
சீர் மேவும் சரவணையில் தவழ்ந்தவனேவா
சிங்கார வேலவனே தங்கத்தேரில் வா வா! – (வேல் வேல்)

வண்ணமயில் கொண்டவனே வா வா வா
வடிவழகே திருமுருகே ஓடோடி வா
எண்ணமெல்லாம் நிறைந்தவன் வா வா வா
எழில் நிலவே தங்கத்தேரில் ஏறிநீயும் வா வா! – (வேல் வேல்)

பிரணவத்தின் பொருள் உரைத்து பெருமை கொண்டவா
திறமைமிகு சூரர்படை வென்று வந்தவா
அருணகிரி பாட்டினிலே அகமகிழ்ந்தவா
அன்பரெல்லாம் மகிழ்ந்திடவே தங்கத்தேரில் வா வா! – (வேல் வேல்)

ஆறுமுகம் ஆகிவந்த வேலவனே வா
அன்பருள்ளம் கோவில் காணும் ஆனந்தனே வா
கூரும் வினை தீர்த்துவைக்க வேலெடுத்து வா
குன்றம்கண்ட தண்டபாணி தங்கத்தேரில் வா வா! – (வேல் வேல்)

காவடிக்கு வழித்துணையாய் வேலைத்தந்தவா
கடம்பனோடு இடும்பனையும் காவல் தந்த வா
ஆடிவரும் காவடியைக் காணவேண்டாமா?
அழகுமுகம் காட்டி இங்கே சிரித்து மகிழ வா வா! – (வேல் வேல்)

ஆடிவரும் காவடிக்குள் சேர்ந்துவருபவன்
அழகுமுகம் காட்டி அங்கே சிரித்து நிற்பவன்
அருளாசி உருவினிலே காட்சி தருபவன்
அவரோடு தனிமையிலே பேசிப் பேசி மகிழ்ப்பவன்! – (வேல் வேல்)

குட்டையய்யா குடும்பத்திலே சொந்தம் கொண்டவன்
கும்பிட்டோர் நலம்காக்கப் பிரம் பெடுப்பவன்
பிரம் பெடுத்து ஆடுகின்ற பேரழகேவா
பெருமை சொன்னோம் தண்டபாணி தங்கத்தேரில் வா வா! – (வேல் வேல்)

உன்னருளால் வாழ்வதில் பெருமை கொள்கிறோம்
உன்வாசல் வருவதிலே சுகமும் காண்கிறோம்
எண்ணமெல்லாம் நிரைந்தவனே எழில் முருகேவா
வண்ணமயில் விட்டிறங்கித் தங்கத்தேரில் வா வா! – (வேல் வேல்)

பலத்துக்காக சண்டை போட்டு பழனி சென்றவா
அவ்வைப் பாடலுக்கே பலமும் தந்து ஊதச்சொன்னவா
அள்ளித்தரும் வள்ளலே என் செந்திலாண்டவா
ஆனந்தமாய் வேல் பிடித்துத் தங்கத்தேரில் வா வா! – (வேல் வேல்)

உன்னழகைக் காண்பதற்கே ஓடி வருகிறோம்
உன்னருளைப் பெறுவதற்கே தேடி வருகிறோம்
வண்ணமயில் ஏறிவரும் வடிவழகே வா
அன்னை தந்த வேலுடனே தங்கத்தேரில் வா வா! – (வேல் வேல்)

அன்னையவள் மீனாட்சி வாழ்த்தி மகிழ்கிறாள்
அப்பன் மதுரை சொக்கேசன் பெருமை கொள்கிறார்
தேவர்மகன் தெய்வானை மெல்ல சிரிக்கிறாள்
தினைப்புனத்து வள்ளிமயில் குலுங்கிக் குலுங்கி சிரிக்கிறாள் – (வேல் வேல்)